Convocatoria de folga na CRTVG contra a nova lei de medios públicos

O comité intercentros da CRTVG (Corporación Radio e Televisión de Galicia) convocou para mañá, martes 11 de marzo, unha xornada de folga en protesta pola nova Lei de Servizos dos Medios Públicos de Comunicación Audiovisual de Galiza, que se debaterá no Parlamento de Galiza. A concentración terá lugar diante do Pazo do Hórreo, xunto coa Plataforma “Por unha CRTVG ao Servizo do Pobo”, a partir das 9:30 horas.

Os representantes do comité intercentros consideran que a nova normativa é “altamente lesiva” para os medios públicos galegos, xa que elimina a necesidade de maiorías reforzadas na elección da dirección xeral, do consello de informativos e do estatuto profesional. Ademais, a lei permite a externalización dos servizos informativos, algo que o persoal rexeita de forma contundente.

Tiago Alvite, portavoz da sección sindical da CIG na CRTVG, denunciou que a reforma busca dar unha aparencia de legalidade á situación de “secuestro” que o goberno do PP ten imposto sobre os medios públicos galegos. O comité intercentros tamén se opón á externalización da programación, como se evidenciou na decisión da dirección de seguir adiante co formato de coprodución no programa “O Termómetro”, en detrimento do programa de produción propia “A Revista”, ignorando as protestas do cadro de persoal.

Ademais, o comité intercentros alertou sobre a decisión da Dirección de Recursos Humanos da CRTVG de non atender máis solicitudes de acceso á xubilación parcial anticipada a partir do 1 de abril, o que supón a suspensión dun dereito recollido no convenio colectivo e avalado por unha recente sentenza xudicial.

Por último, o comité rexeita a implantación de “centros multimedia” sen os tempos de formación e adaptación necesarios, denunciando que a transformación iniciada nas delegacións territoriais non respecta os dereitos de formación e prevención de riscos psicosociais do persoal afectado.

A xornada de folga de mañá será un momento clave para que os traballadores da CRTVG expresen a súa oposición a unha lei que consideran que destrúe os servizos públicos e que pon en perigo a calidade da información e a independencia dos medios de comunicación en Galicia.